اس شخص نے مجھے بہت متاثر کیا | بیاد حضرت مولانا ضیاء الرحمان فاروقی شہید - Al Asir Channel

  یہ میرے بچپن کی بات ہے جب میں ابھی حفظ قرآن کریم کے اختتامی مراحل میں تھا ۔ چونکہ دور دراز پسماندہ ترین علاقے میں ہم نے حفظ قرآن کیا ۔ وہاں علماء کرام کا فقدان تھا مرکزی جامع مسجد کے خطیب بھی عالم نہ تھے ۔ بلکہ گاؤں کے پیشہ ور اور موروثی مولوی سمجھ لیجیے ۔ لیکن ان کی زبان مین جادو کی سی تاثیر تھی ۔ صوم و صلوة پہ گفتگو بہت سارے بے راہ روؤں کو راہ ہدایت پہ لانے کا سبب بنی ۔ الغرض وہاں ہمیں یہ بھی معلوم نہ تھا کہ مولوی کیا شئی ہوتی ہے ؟؟ مولوی بھلا کیوں بنتے ہیں ؟ کیا دنیا میں کوئی متعین طبقہ ایسا بھی ہے جس سے ہم منسلک ہونے کے خواہاں ہیں اور استاد محترم قاری صاحب لاہور سے تجوید و قرات کر کے واپس آئے تھے ۔ وہ تو ظاہر ہے پاکستان کے نامور علماء کرام سے واقف ہوئے ہی ہوں گے ۔ پر کبھی انہوں نے بھی ہمیں نہ بتایا شاید یہ چیزیں ہماری پڑھائی میں مخل سمجھی جاتی ہوں گی۔ اسی وجہ سے یہ بتانا مناسب نہ سمجھا ہو ۔ البتہ والد محترم جوانی کے ایام میں روزی روٹی کے سلسلے میں کراچی ایک تندور پہ کام کرتے تھے ۔ جہاں ساتھ میرے ماموں بھی تھے جن کی محنت کی بدولت والد صاحب دو تین مرتبہ امام سنی اںقلاب مولانا حقنواز جھنگوی کے پروگرامات میں گئے ۔ اور پھر جعلی پیری مریدی سے مستقل تائب ہو کر علماء حق سے ہمیشہ کے لیے اپنی وابستگی قائم کر لی ۔ یہ اس وقت کی بات ہے جب ملک بھر میں حضرت جھنگوی کی خطابت کا طوطی بولتا تھا۔ دشمن ان کی آواز سے تھرتھرا جاتا تھا ۔ ان کے متعلق حضرت والد صاحب سے اور مامون جان کی زبانی سنا تھا کہ وہ بہت شعلہ بیاں اور یکتا روزگار خطیب ہیں پھر ایک بار ایک قریبی رشتہ دار کے ہاں دیگر رشتہ داروں کے ساتھ مہمان بے زبان بنے بیٹھے تھے ۔ وہاں ایک درد دل والی شعلہ بیان تقریر لگی تھی ۔جس کے خطیب صاحب گرج بھی رہے تھے اور ساتھ محسوس ہو رہا تھا کہ وہ چیخ چیخ کر مجمع کو جھنجوڑ رہے ہیں۔ خیر کھانے کا دستر خواں لگ گیا ۔ کھانے میں مختلف انواع و اقسام کی چیزیں تھیں لیکن میری توجہ اس ٹیپ میں لگی کیسٹ کی آواز پہ تھی ۔ کہ یار یہ تقریر ہوتی ہے ؟ جس کے متعلق میں آج تک سنتا آیا ہوں ؟ کیونکہ اس سے قبل جمعے کی ہمیشہ کی تقریر سے ہٹ کر میں نے کوئی تقریر سنی ہی نہیں تھی خیر اس تقریر کے چند جملے مجھے آج بھی یاد ہیں قیامت کی صبح کو صدیقؓ نبیؐ کی عدالت میں آئیں گے۔ اے اللہ کے رسول! میں نے تو تیرے لیے چمڑے کی ٹاکیاں پہن لیں تھیں ، میں نے تو تیرے لیے سب کچھ قربان کر دیا تھا ، میں نے تو تیرے قدموں پہ جان نثار کر دی تھی ، پاکستان میں میرا نام لکھ کر کتے کے فوٹو بنائے گئے ، مولوی خاموش رہے ، پیر خاموش رہے ۔ ، حکمران خاموش رہے ۔۔ یا رسول اللہؐ کلمہ تیرا پڑھتے رہے ، میری عزت لٹاتے رہے ۔ بتا سجاول (غالباً یہ پنجاب کی کوئی بستی ہے جو سجاول کے نام سے موسوم ہے ) بتا سجاول کے سنی تُو کیا جواب دے گا ؟ رسول اللہ کی عدالت ہوگی ، تیرا گریبان ہو گا بتا کیا جواب دے گا ؟

یہ بھی پڑھیں

Maulana Zia Ur Rehman Farooqi Shaheed - Biography

یقیناً یہ الفاظ اتنے درمندانہ تھے کہ اس تقریر کے سیاق و سباق کو نہ سمجھنے کے باوجود مجھ پہ سکت طاری ہو گئی ، میں خیالات میں ڈوب گیا ۔ اور کھانے کے بعد میزبان سے پوچھنے کی کوشش کی وہ جلدی میں برتن اٹھانے میں مصروف تھے ، توجہ نہ دی۔ ان کے بیٹے سے پوچھا تو انہوں نے بتایا کہ یہ مؤرخ اسلام مولانا ضیاء الرحمن فاروقی تھے ۔ پاکستان کے نامور ممتاز عالم دین تھے ، انہین گستاخان صحابہ نے اپنے راستے کا کانٹا سمجھتے ھوئے شہید کر دیا۔ بس اس دن سے میرے دل میں اس شخص کی محبت رچ بس گئی ۔ اس کی تقاریر کو سنا تو یقیناً یہ اپنے انداز مین منفرد خطیب تھا ۔ اس کی تقریر میں ریا کا پہلو ڈھونڈنے میں نہ ملا ۔ بس سنیت کی بیداری کیلیے زور تھا۔ دشمن کو پہچاننے کی ترغیب تھی ۔ صحابہ کرام رضوان اللہ علیھم اجمعین سے محبت عیاں تھی ۔ علمی استدلات تھے ۔ ثقہ تاریخ کے حوالے تھے ۔ چنے ہوئے اشعار ہوا کرتے تھے ۔ پھر جب شعبہ کتب میں آئے اور کتابوں سے شناسائی ہوئی تو ان کی لاجواب کتاب سنیت پہ احسان عظیم " تاریخی دستاویز" پڑھی ۔ کارکن کے نام کتابچہ پڑھا اور دیگر بہت سارے عظمت صحابہؓ ورد فریق مخالف پہ جرائد و رسائل پڑھے ۔ تو اس شخص کی محبت میں اور اضافہ ہوتا چلا گیا ۔ میں نے اسے اپنا آئیڈیل تو پہلی تقریر پر ہی بنا دیا تھا ۔ لیکن کوئی اور خطیب مجھے ان کے مقابل متاثر نہ کر سکا۔ چودہ ممالک میں کئی زبانوں پہ صحابہ کرامؓ کی عظمت و رفعت ، تقدیس و طہارت پہ مبنی لٹریچر انہوں نے پہنچایا۔ دنیا بھر میں امیر عزیمت کی تحریک کو انہوں نے روشناس کروایا ۔ اور بالاخر 18 جنوری 1997ء کو لاہور ہائیکورٹ کے سامنے بم دھماکے سے ان کڑیل خوبصورت نوجوان کو ابدی نیند سلا دیا گیا ۔ مشن ان کا آج بھی جاری ہے اور ان شاءاللہ تاقیامت جاری و ساری رہے گا۔ کل ان کی یوم شھادت کی تاریخ ہے حتی الوسع ایصال ثواب کی بھرپور کوشش کی جائے۔ جزاکم اللہ خیرا

Imam e Azam Abu Hanifa / امام ابوحنیفہ رحمہ اللہ کے سیاسی افکار

 علامہ شبلی نعمانی صاحب

امام صاحب نے اپنی زندگی کے باون سال اموی خلافت اور اٹھارہ برس عباسی دور میں بسر کیے گویا آپ نے اسلام کی ان دو عظیم سلطنتوں کو بذات خود دیکھا۔ امام صاحب اس ساری صورتِ حال سے متاثر ہوئے بغیر نہ رہ سکے۔
منقول ہے کہ جب حضرت زین العابدین (علی بن حسین رحمہ اللہ) کے بیٹے زید نے ۱۲۱ھج میں شام بن عبدالملک اموی کے خلاف بغاوت کی تو امام ابوحنیفہ نے فرمایا: زید کا جہاد کے لیے نکلنا آنحضرت صلی اللہ علیہ وسلم کے بدر کے دن نکلنے کے مشابہ ہے۔
اس سے واضح ہوتا ہے کہ آپ امویوں کے خلاف بغاوت کو شرعی نقطہ نظر سے جائز سمجھتے تھے۔
سنہ 122 ھ میں زید کے قتل ہوجانے سے ان کی بغاوت ختم ہوگئی۔ سنہ 125 ھ میں ان کے فرزند یحیی خراسان میں آپ کے جانشین ہوئے اور والد کی طرح قتل ہوئے۔ پھر عبداللہ بن یحیی اپنا خاندانی حق لے کر اٹھے اور یمن میں بنوامیہ کے آخری خلیفہ مروان بن محمد کی فوج سے لڑے۔ سنہ 130 ھ میں آپ نے اپنے آباء و اسلاف کی طرح شہادت پائی۔ ہشام بن عبدالملک اموی نے سنہ 125ھ میں وفات کی۔ اس کے بعد ولید بن یزید، ابراہیم بن ولید، مروان بن محمد یکے بعد دیگرے تخت نشین ہوئے۔
خلیفہ مروان بن محمد کے عراقی عامل یزید بن عمر بن ہبیرہ نے امام اعظم کو بلا کر محکمہ قضا کے خزانہ کی حفاظت کی ذمہ داری آپ کو تفویض کرنا چاہی در اصل وہ آزمانا چاہتا تھا کہ بنو امیہ سے آپ کی کتنی محبت ہے ابوحنیفہ نے انکار کردیا۔ ابنِ ہبیرہ نے یہ پیشکش نہ قبول کرنے کی صورت میں زد و کوب کا حلف اٹھایا پھر امام صاحب کو قید کردیا اور جلاد کو کوڑے مارنے کا حکم دیا۔ جلاد متواتر کئی روز تک کوڑے مارتا رہا۔ مجبوراً ابن ہبیرہ نے رہائی کا حکم دیا۔ امام صاحب رہا ہوئے اور سوار ہو کر مکہ مکرمہ پہنچنے میں کامیاب ہوگئے۔ یہ سنہ 130 ھ کا واقعہ ہے۔ عباسی خلافت قائم ہونے تک آپ مکہ میں اقامت پذیر رہے اور خلیفہ ابوجعفر منصور کے عہد خلافت میں کوفہ آئے۔

یہ بھی پڑھیں

خواجہ الطاف حسین حالی  سوانح حیات 

سنہ 132 ھ میں سلطنت اسلام نے دوسرا پہلو بدلا۔ یعنی بنوامیہ کا خاتمہ ہوگیا۔ عباسیوں نے خلفائے بنو امیہ کی قبریں اکھڑوا کر ان کی ہڈیاں تک جلادیں پھر کیا تھا آلِ عباس تاج و تخت کے مالک ہوئے۔ اس خاندان کا پہلا فرماں روا ابوالعباس سفاح تھا۔ اس نے چار برس کی حکومت کے بعد سنہ 136ھ میں وفات پائی۔ سفاح کے بعد اس کا بھائی منصور تخت نشین ہوا۔ پھر جب تک علویوں اور عباسیوں میں خصومت کا آغاز نہ ہوا، امام صاحب خاموش رہے۔ مگر جب علویوں اور عباسیوں میں ٹھن گئی تو آپ نے علویوں کی تائید کی چناں چہ جب ابراہیم نے منصور کے خلاف خروج کیا تو آپ کا میلان ابراہیم کی جانب تھا۔ حماد بن اعین کا بیان ہے ابوحنیفہ لوگوں کو ابراہیم کی مدد پر ابھارتے تھے۔ ادھر منصور کے بدباطن خواص و امراء امام صاحب کے خلاف اشتعال انگیزی اور تنفر کا کوئی دقیقہ فرو گذاشت نہ کرتے تھے۔
خطیب بغدادی روایت کرتے ہیں کہ ربیع جو خلیفہ منصور کا عرض بیگی تھا، امام ابوحنیفہ سے عداوت رکھتا تھا ایک دن خلیفہ منصور نے امام ابوحنیفہ کو طلب کیا۔ ربیع بھی حاضر تھا، منصور سے کہا: یاامیرالمومنین! یہ شخص آپ کے دادا یعنی عبداللہ بن عباس کی مخالفت کرتا ہے اس طرح کہ عبداللہ بن عباس فرماتے تھے کہ اگر کوئی شخص کسی بات پر قسم کھالے اور دو ایک روز کے بعد ان شاء اللہ کہہ لے تو یہ استثناء قسم میں داخل سمجھا جائے گا اور قسم کا پورا کرنا کچھ ضروری نہ ہوگا۔ یہ ابوحنیفہ اس کے خلاف فتویٰ دیتے ہیں اور کہتے ہیں ان شاء اللہ کا لفظ قسم کے ساتھ ہو تو البتہ جزئی قسم سمجھا جائے گا ورنہ لغو اور بے اثر ہے۔
امام صاحب نے کہا امیرالمومنین! ربیع کا خیال ہے کہ لوگوں پر آپ کی بیعت کا کچھ اثر نہیں ہے۔ منصور نے کہا: یہ کیوں کر کہا؟ امام صاحب نے کہا: ان کا گمان ہے کہ جو لوگ دربار میں آپ کے ہاتھ پر بیعت خلافت کرتے ہیں اور قسم کھاتے ہیں، گھر پر جاکر ان شاء اللہ کہہ لیا کرتے ہیں جس سے قسم بے اثر ہو جاتی ہے اور ان پر شرعاً کچھ مواخذہ نہیں رہتا۔ خلیفہ منصور ہنس پڑا اور ربیع سے کہا کہ تم ابوحنیفہ کو نہ چھیڑا کرو۔ ان پر تمہارا داؤ نہیں چل سکتا۔
امام صاحب دربار سے نکلے تو ربیع نے اُن سے کہا: ”تم میرا خون کرنا چاہتے تھے؟“ امام صاحب نے فرمایا: ”نہیں بلکہ تم ہی میرا خون بہانا چاہتے تھے۔میں نے تمہیں بھی بچالیا اور خود بھی بچ گیا۔“ پھر امام صاحب نے اپنے قریب والوں سے فرمایا: ”یہ آدمی مجھے باندھنا چاہتا تھا مگر میں نے اسے ہی باندھ دیا۔“
ابوالعباس جو منصور کے دربار میں معزز درجہ رکھتا تھا۔ امام صاحب کا دشمن تھا اور ہمیشہ ان کو ضرر پہنچانے کی فکر میں رہتا تھا۔ ایک دن امام صاحب کسی ضرورت سے دربار میں گئے۔ اتفاق سے ابوالعباس بھی حاضر تھا۔ لوگوں سے کہا: آج ابوحنیفہ میرے ہاتھ سے بچ کر نہیں جاسکتے۔ امام صاحب کی طرف مخاطب ہوا اور کہا کہ ”ابوحنیفہ! امیرالمؤمنین یعنی خلیفہ منصور کبھی کبھی ہم لوگوں کو بلا کر حکم دیتے ہیں کہ اس شخص کی گردن مار دو۔ ہم کو مطلق معلوم نہیں ہوتا کہ وہ شخص واقعہ مجرم ہے یا نہیں۔ ایسی حالت میں ہم کو اس حکم کی تعمیل کرنی چاہیے یا انکار کردینا چاہے؟“
امام صاحب نے کہا: ”تمہارے نزدیک خلیفہ کے احکام حق ہوتے ہیں یا باطل؟“ منصور کے سامنے کس کی تاب تھی کہ احکام خلافت کی نسبت ناجائز ہونے کا احتمال ظاہر کرسکتا۔ ابوالعباس کو مجبوراً کہنا پڑا کہ حق ہوتے ہیں۔ امام صاحب نے فرمایا: ”تو پھر حق کی تعمیل میں پوچھنا کیا؟“ پھر امام صاحب نے اپنے قریب والوں سے فرمایا: ”یہ آدمی مجھے باندھنا چاہتا تھا مگر میں نے اسے ہی باندھ دیا۔“
جب خلیفہ منصور نے قضا کے عہدہ کی پیشکش کی تو امام صاحب نے صاف انکار کردیا تھا اور کہا کہ میں اس کی قابلیت نہیں رکھتا۔ منصور نے غصہ میں آکر کہا: ”تم جھوٹے ہو۔“ امام صاحب نے کہا: ”اگر میں جھوٹا ہوں تو یہ دعویٰ ضرور سچا ہے کہ میں عہدہ قضا کے قابل نہیں کیوں کہ جھوٹا شخص قاضی مقرر نہیں ہوسکتا۔“
بہرحال اہل بیت کی طرف آپ کا صرف سیاسی میلان ہی نہ تھا بلکہ ان سے علمی تعلق بھی رکھتے تھے۔ مثلاً حضرت زید بن علی زین العابدین رحمہ اللہ المتوفی سنہ 122ھ سے آپ کا علمی رابطہ تھا اور وہ آپ کے اساتذہ میں شمار ہوتے تھے۔
آپ محمد باقر رحمہ اللہ اور جعفر صادق رحمہ اللہ سے روایت کرکے ہیں جیسا کہ مسند ابی حنیفہ کے مطالعہ سے واضح ہوتا ہے۔
آخر کار آپ کا خاتمہ بھی حب اہل بیت، زہد و تقویٰ اور حق و صداقت سے وابستگی پر ہوا۔
اہل بیت سے میلان و محبت کے باوجود صحابہ سر بڑا حسنِ ظن تھا چناں چہ حضرت ابوبکر رضی اللہ عنہ و حضرت عمر رضی اللہ عنہ کو صفِ اول میں جگہ دیتے تھے۔ حضرت عثمان کے حق میں بر سرِ عام شہر کوفہ میں دعاء رحمت کیا کرتے تھے۔ (حیات حضرت امام ابوحنیفہ)
ایک بار کسی نے سوال کیا کہ حضرت علی رضی اللہ عنہ اور امیرمعاویہ رضی اللہ عنہ کے باہمی اختلافات کے متعلق دریافت کیا: آپ کیا کہتے ہیں؟ فرمایا کہ قیامت میں جن باتوں کی پرسش ہوگی مجھ کو ان کا ڈر لگا رہتا ہے ان واقعات کو خدا مجھ سے نہ پوچھے گا اس لیے ان پر توجہ کرنے کی چنداں ضرورت نہیں۔
خیرالقرون میں مسلمانوں کے درمیان جو اختلافات رونما ہوئے ان کو اسلام کا ایک ضروری مسئلہ قرار دینا اور پر بحثوں کا دفتر تیار کرنا ایک فضول کام ہے۔ اسی کی طرف امام صاحب نے اشارہ کیا ہے۔

اشاعت: ماہنامہ الابرار کراچی- اکتوبر 2019ء

ڈرون حملے سے افغان شہریوں کا قتل عام

افغانستان کے صوبے ننگرہار میں امریکی ڈرون حملے کے نتیجے میں کھیتوں سے چلغوزے چننے کے بعد آرام کرنے والے 30 مزدور جاں بحق، 40 زخمی ہوگئے۔ افغان وزارت دفاع نے ڈرون حملے کی تصدیق اور واقعے سے متعلق تفصیلات دینے سے انکار کردیا۔ دوسری جانت افغان صوبے زابل کے شہر قلات میں طالبان کی جانب سے افغان انٹیلی جنس ایجنسی کے ٹریننگ بیس کو نشانہ بنایا گیا، جس میں 20 افراد ہلاک اور 100 کے قریب زخمی ہوگئے۔
امریکی فضائی حملے میں بے ضرر محنت کشوں کی بڑی تعداد میں اموات کی خبر، دنیا بھر میں صدمے کے ساتھ پڑھی اور سنی گئی۔ اس میں دورائے نہیں کہ رواں ماہ کے آغاز پر امریکا اور طالبان کے مابین امن مذاکرات آخری مرحلے میں ناکام ہوجانے کے بعد افغانستان ایک مرتبہ پھر بے یقینی اور خوف و دہشت کے ماحول میں داخل ہوگیا ہے۔ طالبان نے عسکری مزاحمت میں تیزی لاتے ہوئے گزشتہ تین ہفتوں میں متعدد امریکی اور افغان کٹھی پتلی انتظامیہ کے ٹھکانوں، تنصیبات اور دفاتر کو نشانہ بنایا۔ ایسا محسوس ہو رہا ہے کہ طالبان کی تابڑ توڑ کارروائیوں نے امریکا کو شدید ہیجان، غصہ اور اشتعال میں مبتلا کردیا ہے۔ چناں چہ وہ براہ راست فریق مخالف کو نقصان پہنچانے میں ناکامی کا سامنا کرنے کے بعد عوام الناس کو آسان ہدف سمجھ کر اپنی خوئے خون آشامی کی تسکین کررہا ہے۔ معصوم افغان شہریوں پر امریکی طیاروں کے ذریعے بمباری اور بڑی تعداد میں انسانی جانوں کے ضیاع کا واقعہ پہلی مرتبہ پیش نہیں آیا۔ گزشتہ اٹھارہ برس کے دوران ایسے بیسیوں واقعات رونما ہوچکے، لیکن مجال ہے کہ بات رسمی معافی سے آگے بڑھی ہو۔ عالمی جنگی قوانین کے رو سے متحارب قوتوں کی ذمہ داری ہے کہ عام لوگوں کی جان و مال کا تحفظ یقینی بنایا جائے۔ بزعم خویش اقوام عالم کی سربراہی کے ناتے امریکا کی ذمہ داری ہے کہ وہ اس جنگی اصول کی پاس داری کرے اور بے گناہوں کے خون میں ہاتھ رنگنے سے گریز کرے۔
امریکی قیادت کو معلوم ہونا چاہیے کہ ایسی وحشیانہ اور سنگدلانہ کارروائیاں افغان عوام کے اندر امریکی تسلط کے خلاف انتقام، نفرت اور اشتعال پیدا کرتی ہیں اور انہیں کسی بھی حد تک جانے کا راستہ دکھاتی ہیں۔ اٹھارہ برس پر مبنی طویل جنگ نے ثابت کردیا ہے کہ امریکا ٹیکنالوجی، مادی طاقت اور جدید اسلحے کے زور پر افغان عوام کے جذبات و احساسات کو کچلنے اور انہیں اپنا محکوم بنانے میں بری طرح ناکام ہوچکا ہے۔ اس کے بالمقابل افغانستان کے طول وعرض میں طالبان کا بڑھتا ہوا اثر رسوخ افغان عوام کے درمیان ان کی پذیرائی اور اعتماد کی دلیل ہے۔ ایسے میں یہ کہنا غلط نہ ہوگا کہ امریکا کی جانب سے طاقت کا اندھا دھند استعمال خود اس کے لیے مسائل کو جنم دینے کا باعث بنننے جارہا ہے۔ نہیں بھولنا چاہیے کہ طاقت کے زعم میں آکر ہی امریکا افغانستان پر حملہ آور ہوا اور اس کی آزادی اور خودمختاری کو پامال کرکے رکھ دیا، لیکن کچھ ہی عرصے میں غیور و جسور افغانوں نے امریکا کو جتلادیا کہ اس کے پاس آنے کا راستہ تو ہے، جانے کا نہیں۔ نہ جائے ماندن نہ پائے رفتن کے مصداق گزشتہ سال امریکی صدر ڈونلڈ ٹرمپ نے افغانستان میں قیام امن کی کوششوں کو موقع دے کر اس گتھی کو سلجھانے کی کوشش کی۔ امریکی انانیت اور من مانی کے باعث درمیان میں کئی مواقع ایسے آئے جس میں بات چیت کا دروازہ بند ہوتا نظر آیا، تا ہم تمام فریق اعتماد سازی اور افہام و تفہیم کی ضرورت پر متفق رہے۔ مرحلہ وار بات چیت کا حتمی نتیجہ سامنے آنے والا تھا کہ صدر ڈونلڈ ٹرمپ نے طالبان کو مذاکرات کی ناکامی کا ذمہ دار ٹھہراتے ہوئے مصالحتی عمل کی بساط لپیٹ کر افغان مسئلے کو نیا رخ دے دیا۔
جنگ کتنے طویل ہوجائے، اس کا اختتام بات چیت کی میز پر ہوا کرتا ہے۔ حالیہ دونوں میں طالبان مذاکرات کاروں نے امریکا کو مذاکرات کی پیشکش کرکے واضح کردیا ہے کہ وہ معاملے کو منطقی انجام تک پہنچانے میں سنجیدہ اور یکسو ہیں اور گیند امریکا کے کوٹ میں ہے۔ امریکا جنگ کو طول دینا چاہتا ہے تو طالبان جوابی مزاحمت کے لیے تیار ہیں اور اگر مکالمے کے ذریعے مسئلے کے سنجیدہ اور قرار واقعی حل پر یقین رکھتا ہے تو وہ اس کا خیرمقدم کریں گے اور افغان قوم کی خواہشات کے مطابق اس میں حصہ لیں گے۔ طالبان نے سیاسی، سفارتی اور عسکری سطح پر ثابت کردیا ہے کہ افغان قوم کے مفادات کے خلاف کوئی فیصلہ اور اقدام ان کے لیے قابل قبول نہ ہوگا۔ امریکا طالبان کی پیشکش کا کیا جواب دیتا ہے، شاید اس کے لیے کچھ عرصہ انتظار کرنا پڑے تا ہم یہ حقیقت ہے کہ افغانستان میں جنگ کا خاتمہ صرف افغان عوام کی ضرورت نہیں بلکہ خطے کے تمام ممالک کا محفوظ مستقبل اس میں مضمر ہے۔ بنابریں ضرورت ہے کہ جن ممالک نے اب سے قبل افغان جنگ کے بنیادی فریقوں کے مابین پل کا کردار ادا کیا تھا، وہ ایک مرتبہ پھر آگے آئیں اور مشترکہ مفادات اور علاقائی امن و استحکام کی خاطر کردار ادا کریں۔ بالخصوص پاکستان کے لیے افغانستان کی تازہ صورت حال چیلنج بنتی جارہی ہے۔ کون نہیں جانتا کہ افغان جنگ سے سب سے زیادہ نقصان پاکستان کو ہوا۔ ہماری معیشت، داخلی استحکام اور ملکی سلامتی داؤ پر لگ گیا اور ہزاروں پاکستانی اس جنگ کی بھینٹ چڑھ گئے۔ لہذا افغانستان کی صورت حال پر غور و فکر کے لیے پاکستان کو متعلقہ ممالک کو دعوت دینی چاہیے اور کسی نتیجے تک پہنچنے کی کوشش کرنی چاہیے، کیوں کہ محفوظ افغانستان ہی محفوظ پاکستان کا ضامن بن سکتا ہے۔

اداریہ روزنامہ اسلام- 21 ستمبر/2019ء

کالمز (مضامین)۔

  مولانامحمد اعظم طارق حالات و واقعات

مولانا اسلم شیخوپوری شہید رحمہ اللہ

ھلمند آپریشن امریکہ کی غلطی

پرویز کا عزم نو

کیا جنرل ضیاء الحق قادیانی نواز تھے؟

معصوم عوام_معصوم خوشیاں

دارالعلوم دیوبند ؛ اسلامی بینکاری

!..... وہ جو کوئی بھی تھا

ڈرون حملوں کی اصل کہانی

میں آرہا ہوں___تیسرا پرویز

پاکستان کے خلاف زہریلا پروپیگنڈہ

بادشاہتوں کا قبرستان

محبُ الوطن کون؟حُب الوطنی کیا ہے؟

یہ اندازِ گفتگو کیا ہے ؟

سیاچن سے آغازکیجئے

سیاچن میں سرفروشانِ اسلام کا واقعہ

جب قائداعظم روئے تھے

قیامِ پاکستان،بعض اکابرکےاندیشے

علمائے دیوبند کے مسلک

موبائل دستی فتنہ Q

کرکٹ کا جنون

آؤ غلامی کی زنجیریں توڑ ڈالیں

تبلیغی اجتماع اور اس کا پیغام

مسلمان کی لاش سمندر بُرد کرنا اسلام کی توہین ہے

کچھ موت کے بارے میں

انبیاءعلیھم السّلام کے دیس میں

وہ شہید ہے _عباس اطھر

دینی مدارس کے خلاف آپریشن

نابالغ میڈیا بنام اسامہ منجانب ابامہ

آہ حاجی صاحب رحمہ اللہ

ہمّت ہے تو پڑھ لیجئے

مولانا سلیم اﷲ صاحب کا خط

پاکستان کےخلاف ایک گہری سازش

بیادِ حضرت مولانا مرغوب الرحمٰن رح

دارالعلوم کراچی (سلیم صافی)۔

رجب کے کونڈوں کی حقیقت(رضوان